ကုလသမဂ္ဂ အထွေထွေညီလာခံမှာ မြန်မာ့အရေး ဆုံးဖြတ်ရန် တင်ပြမည်

ဧရာဝတီ နိုဝင်ဘာ ၁၂၊ ၂၀၀၈
ဒီဇင်ဘာလအတွင်း ပြုလုပ်မည့် ကမ္ဘာ့ကုလသမဂ္ဂ အထွေထွေညီလာခံ၌ မြန်မာစစ်အစိုးရနှင့်ပတ်သက်ပြီး ပြင်းပြင်းထန်ထန် ဝေဖန်ဆုံးဖြတ်ချက်ချရန် အဖွဲ့ဝင်နိုင်ငံပေါင်း ၄၃ နိုင်ငံက ဆန္ဒပြုမည်ဖြစ်ကြောင်း သိရသည်။
ကုလသမဂ္ဂ အဖွဲ့ဝင်နိုင်ငံများထဲမှ အမေရိကန်၊ ဗြိတိန်၊ တောင်ကိုရီးယား၊ နော်ဝေး၊ အီတလီ၊ အစ္စရေး၊ ဂျာမနီ၊ ကနေဒါ၊ သြစတေးလျ အစရှိသည့်နိုင်ငံများက ယင်းကဲ့သို့ဆုံးဖြတ်ချက်ချမှတ်ရန် ဆန္ဒပြုအစီအစဉ်ကို ဦးဆောင်ပြုလုပ်ခြင်းဖြစ်သည်။
စစ်အစိုးရ အနေနှင့် ၂၀၁၀ တွင် ပြုလုပ်မည့် ရွေးကောက်ပွဲကို လွတ်လပ်၍ တရားမျှတမှုရှိရန်၊ လူ့အခွင့်အရေးနှင့် ဒီမိုကရေစီပြန်လည်ထွန်းကားရေးတို့ကို အပြည့်အ၀ လေးစားလိုက်နာရန် စသည့် တိုက်တွန်းချက်များ ပါဝင်မည့် ဆုံးဖြတ် ချက်များချမှတ်ရန်ကို အထွေထွေညီလာခံမတိုင်မီ အဆိုပါ နိုင်ငံများအတွင်း ဆွေးနွေး၍ ညီလာခံသို့ တင်သွင်းမည် ဖြစ်သည်။
ဆွေးနွေးချက်များ၌နေအိမ်အကျယ်ချုပ်ကျနေသည်မှာ ၁၃ နှစ်ရှိပြီဖြစ်သော မြန်မာ့ဒီမိုကရေစီခေါင်းဆောင် ဒေါ်အောင်ဆန်း စုကြည် အပါအ၀င် ဖမ်းဆီးခံထားရသည့် ၈၈ မျိုးဆက်ကျောင်းသား ခေါင်းဆောင်များ၊ တိုင်းရင်းသား လူမျိုးစုခေါင်းဆောင် များနှင့် နိုင်ငံရေးအကျဉ်းသားအားလုံး လွှတ်ပေးရန် တောင်းဆိုချက်များလည်း ထည့်သွင်းဆွေးနွေးမည် ဖြစ်ကြောင်း သိရသည်။
အထွေထွေညီလာခံ ဆုံးဖြတ်ချက်တွင် မြန်မာစစ်အစိုးရအား ကမ္ဘာ့အလုပ်သမားအဖွဲ့ချုပ်၊ လူ့အခွင့်အရေး ကော်မရှင်၊ ကုလသမဂ္ဂ လူ့အခွင့်အရေး ကောင်စီ၊ မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ်များနှင့် အပြည့်အ၀ပူးပေါင်း ဆောင်ရွက်ရန်တောင်းဆိုချက်များ ပါရှိရန်လည်း ဆွေးနွေးမည်ဖြစ်သည်။
ထို့အပြင် မြန်မာစစ်အစိုးရအနေနှင့် ငြိမ်းချမ်းစွာ လှုပ်ရှားဆောင်ရွက်နေသော နိုင်ငံရေးလှုပ်ရှားသူများအပေါ် ကန့်သတ် ချုပ်ချယ်မှုများပြုလုပ်နေခြင်းကို ရုပ်သိမ်းရန်၊ သတင်းဌာနများနှင့် သတင်းဆက်သွယ်ရေးလုပ်ကိုင် သူများကို လွတ်လပ်စွာ လုပ်ကိုင်ခွင့်ပေးရန်တို့ကိုလည်း အထွေထွေညီလာခံ ဆုံးဖြတ်ချက်တွင် ထည့်သွင်း ဆုံးဖြတ်ရန်တို့ ပါရှိသည်။ယင်းအထွေထွေညီလာခံ ဆုံးဖြတ်ချက်တွင် အမျိုးသားဒီမိုကရေစီအဖွဲ့ချုပ် အပါအ၀င် တိုင်းရင်းသားကိုယ်စားလှယ်များ၊ အတိုက်အခံ နိုင်ငံရေး အင်အားစုများနှင့် တွေ့ဆုံဆွေးနွေးရေးပြုလုပ်ရန်၊ နိုင်ငံရေးလှုပ်ရှားသူများ အားဖမ်းဆီးနေခြင်း များကို အမြန်ဆုံးရပ်ဆိုင်းရန် အစရှိသည့် စစ်အစိုးရအား တိုက်တွန်းချက်များချမှတ်ရန် တို့လည်း ပါရှိမည် ဖြစ်သည်။