ဒုတိယမြောက် A/H1N1 တုပ်ကွေးကူးစက်ခံရသူ တွေ့ရှိ

၁၁ရက် ဇူလိုင် ၂၀၀၉။ ပုလဲနက်

ရန်ကုန်မြို့တွင် A/H1N1တုပ်ကွေး ကူးစက်ခံထားရသူ တစ်ဦးကို ထပ်မံတွေ့ရှိခဲ့ကြောင်း နိုင်ငံပိုင် မြန်မာ့အလင်း သတင်းစာက ဖော်ပြခဲ့သည်။ ယခု ကူးစက် ခံရသူမှာ အမျိုးသားဖြစ်ပြီး မြန်မာနိုင်ငံအတွင်း ဒုတိယမြောက် A/H1N1လူနာလည်း ဖြစ်လာခဲ့သည်။ ထိုသူသည် ဇူလိုင်လ (၆)ရက်နေ့က ထိုင်းလေ ကြောင်းလိုင်း လေယာဉ်ခရီးစဉ် အမှတ်(FD 3770)ဖြင့် ဘန်ကောက်မြို့မှ ပြန်လည်ရောက်ရှိလာသူဖြစ်ပြီး လေဆိပ်တွင် စစ်ဆေး ခဲ့စဉ်က အဖျားမရှိခဲ့ပေ။ နောက်တစ်ရက် မွန်းလွဲပိုင်းတွင်မူ လည်ချောင်းနာက အဖျားအနည်းငယ် ရှိလာသဖြင့် ပြင်ပလူနာအဖြစ် ကုသမှု ခံယူခဲ့ပြီးနောက် ဇူလိုင်လ (၈) ရက်နေ့တွင် သက်ဆိုင်ရာမြို့နယ် ကျန်းမာရေး ဦးစီးဌာနမှ တာဝန်ရှိသူများက နေအိမ်သို့ သွားရောက်စစ်ဆေးကာ ဝေဘာဂီ ဆေးရုံကြီးသို့ တင်ပို့ပေးခဲ့သည်။ ဆေးရုံတွင် ၎င်းအား သီးသန့်ခန်းအတွင်း ထားရှိပြီး ဓာတ်ခွဲ စစ်ဆေး မှုများ ပြုလုပ်ခဲ့ရာမှ ထိုရောဂါ ဖြစ်ပွားနေကြောင်း အတည်ပြု တွေ့ရှိခဲ့သည်။
အဆိုပါလူနာအား အထူးကု ဆရာဝန်ကြီးများက ကြပ်မတ်ကုသပေးနေပြီး ဇူလိုင်လ (၉)ရက်နေ့ထိ အခြေအနေမှာ အဖျားမတက်ဘဲ သက်သာလျက်ရှိကြောင်း သိရသည်။ ကျန်းမာရေး ၀န်ကြီးဌာနက ထိုရောဂါ ကူးစက်ပြန့်ပွားမှု မရှိစေရန်အတွက် လူနာနှင့်အတူနေသော မိသားစုများအား နေအိမ်ပြင်ပသို့ သွားရောက်ခွင့် မပြုဘဲ အခြေအနေ စောင့်ကြည့်နေသလို လူနာနှင့်အတူ လေယာဉ်တစ်စင်းတည်း လိုက်ပါလာသည့် ခရီးသည် (၁၀၄)ဦးကိုလည်း စောင့်ကြည့်လျက်ရှိသည်။ မြန်မာနိုင်ငံအတွင်း A/H1N1ရောဂါ ကူးစက်ပြန့်ပွားမှု မရှိစေရန်အတွက် ကျန်းမာရေးဝန်ကြီးဌာနမှ တာဝန်ရှိသူများနှင့် သက်ဆိုင်ရာ ၀န်ကြီးဌာနများ ပူး ပေါင်းဆောင်ရွက်နေသလို ရောဂါကာကွယ် တားဆီးရေး လုပ်ငန်းများတွင် ပြည်သူများလည်း တတပ်တအား ပါဝင်ကူညီရန် နှိုးဆော်ထားကြောင်း သတင်း ရရှိသည်။