ပြည်တွင်းသတင်းတိုများ

မြန်မာနိုင်ငံရှိ သွေးလှူရှင်အသင်းများအနက်မှ တစ်ခုဖြစ်သော ရင်ခုန်သံသွေးလှူရှင်အသင်း၏ (၈)ကြိမ်မြောက်စုပေါင်းသွေးလှူဒါန်းပွဲကို သြဂုတ်လတွင် ကျင်းပပြုလုပ်မည်ဟု သိရသည်။ သြဂုတ်လ ၂ ရက်(စနေနေ့)၌ နံနက် ၈နာရီမှ ၁၁နာရီအထိ ရန်ကုန်မြို့၊ လှိုင်မြို့နယ်အတွင်းရှိ မြန်မာအင်ဖိုတက်ခ်တွင် ကျင်းပပြုလုပ်မည်ဖြစ်သည်။ ရင်ခုန်သံသွေးလှူရှင်အသင်း၌ သွေးလှူဒါန်းရာတွင် အသင်းပိုင် အဖြစ်အသုံးပြု နိုင်ရန် ခေါက်ကုတင်များ လိုအပ်လျက်ရှိပြီး လှူဒါန်းလိုသူများအနေဖြင့် အောက်ပါလိပ်စာသို့ ဆက်သွယ် မေးမြန်း လှူဒါန်းနိုင်ကြောင်းလည်း သိရသည်။
ကိုမျိုးမင်း (ခ) ပက်ထရစ်
အတွင်းရေးမှူး၊ ရင်ခုန်သံသွေးလှူရှင်အသင်းဖုန်း ၂၄၃ ၅၄၂၊ ၃၈၉ ၈၂၇၊ ၀၉၅၁ ၇၃၂၅၅

****************************

နာဂစ်မုန်တိုင်းကြောင့် လူဦးရေ(၈၄,၅၃၇) သေဆုံးပြီး (၅၃,၈၃၆)ဦး ပျောက်ဆုံးနေကြောင်း အစိုးရ၏ နောက်ဆုံးထုတ်ပြန်သော စာရင်းအရ သိရသည်။ ကုလသမဂ္ဂအစီရင်ခံစာတစ်ခုအရ အရွယ်ရောက် အမျိုးသား ၁၀၀ မှာ ၃ဦးသေဆုံးပြီး အရွယ်ရောက် အမျိုးသမီး ၁၀၀မှာ ၆ဦး သေဆုံးသည်ဟု ဆိုပါသည်။ အမျိုးသမီးသေဆုံးမှုပမာဏမှာ အမျိုးသားသေဆုံးမှုထက် ၂ဆဖြစ်နေကြောင်းတွေ့ရသည်။ လက်ရှိအချိန်၌ မုန်တိုင်းဒဏ်အပြင်းထန်ဆုံးခံခဲ့ရသော ရွာများတွင် အမျိုးသမီးဦးရေမှာ အလွန်နည်းပါးနေကြောင်းလည်း ကယ်ဆယ်ရေးဝန်ထမ်းများက ပြောကြားသည်။

****************************

ပြည်ပမှ ခရီးသွားဧည့်သည်များ လာရောက်မှုမှာ ပြီးခဲ့သည့် ၂၀၀၇ခုနှစ် စက်တင်ဘာလ နောက်ပိုင်းမှစပြီး လျော့ပါးလာခဲ့ရာ နာဂစ်မုန်တိုင်းတိုက်ခတ်အပြီးမှာ ပိုမိုနည်းပါးသွားကြောင်း သိရသည်။ မုန်တိုင်းမတိုင်ခင်ကာလ၌ စုံစမ်းမှုများရှိခဲ့သော်လည်း ယခုအချိန်တွင် လာရောက်လည်ပတ်ဖို့ မေးမြန်းစုံစမ်းမှုများပင် မရှိသလောက်ဖြစ်နေပြီး လာရောက်လည်ပတ်ရန် စီစဉ်ထားမှုအချို့လည်း ပြန်လည်ဖျက်သိမ်းခြင်းများနှင့် ကြုံရသည်။ ဧည့်လမ်းညွှန်အဖြစ်အသက်မွေးဝမ်းကျောင်းပြုသူများနှင့် မြန်မာမှုအမှတ်တရပစ္စည်း ရောင်းသူများ အခက်အခဲတွေ့နေရကြောင်း သိရသည်။ လက်ရှိအချိန်မှာ မိုးရာသီကာလဖြစ်သောကြောင့် ပြည်ပသာမက ပြည်တွင်းခရီးသွားများပါ နည်းပါးနေတာကြောင့် အချို့ခရီးသွားလုပ်ငန်းများ ဝန်းထမ်းလျှော့ချကြပြီး အချို့ကတော့ နိုင်သလောက် ဆက်လက်လုပ်ကိုင်နေကြသည်။

****************************

တရုတ်နိုင်ငံ၌ ကျင်းပပြုလုပ်မည့် ဘေဂျင်းအိုလံပစ်ပွဲတော်သို့ မြန်မာနိုင်ငံမှ အားကစားနည်း(၅)မျိုး ဝင်ရောက်ယှဉ်ပြိုင်မည်ဖြစ်သည်။ ပြေးခုန်ပစ်၊ မြားပစ်၊ ရေကူး၊ ကနူးကယက်နှင့် လှေလှော်အားကစားနည်းတွေ ဝင်ရောက်ယှဉ်ပြိုင်မှာဖြစ်ပြီး အားကစားသမား(၆)ဦး သွားရောက်ယှဉ်ပြိုင်ကြမည်ဖြစ်သည်။ လေးနှစ်တစ်ကြီမ် ကျင်းပပြုလုပ်သော အိုလံပစ်ပြိုင်ပွဲသို့ မြန်မာနိုင်ငံမှ ပွဲစဉ်တိုင်းသို့ ဝင်ရောက်ယှဉ်ပြိုင်ခဲ့သော်လည်း အိုလံပစ်ဆုတံဆိပ်ရရှိခဲ့ခြင်း မရှိကြောင်းသိရသည်။ မှတ်တမ်းများအရ ၁၉၇၂ခုနှစ်မှာ ကျင်းပခဲ့သည့် ဂျာမနီနိုင်ငံ မြူးနစ်အိုလံပစ်ပွဲတွင် မြန်မာဘောလုံးအသင်း ရရှိခဲ့သော အသန့်ရှင်းဆုံးဆုမှာ အမြင့်ဆုံးဖြစ်သည်။ ဘေဂျင်းအိုလံပစ်ပွဲတော်ကို လာမည့်သြဂုတ်လ ၈ ရက်မှ ၂၄ ရက်နေ့အထိ ကျင်းပမည်ဖြစ်သည်။

ပုလဲနက်